İranda benzinin bahalaşmasından əldə olunan gəlirin bir qismi xalqa veriləcək.
Publika.az xəbər verir ki, rəsmi Tehran etiraz aksiyalarına səbəb olan benzin bahalaşmasından qazanılan gəlirdən ailələrə 55-205 min tümən arasında yardım ayıracaq.
Ötən gün Nazirlər Kabinetinin toplantısından sonra açıqlama verən prezident Həsən Ruhani daha əvvəl vəd edilən subsidiyaların bu gündən etibarən hesablara yatırılması üçün Büdcə və Planlaşdırma Qurumuna təlimat verib.
Prezident ən aşağı gəlirli təbəqədən başlayaraq 60 milyon insana ödənməsi planlaşdırılan subsidiyaların hamısının bu həftənin sonuna qədər göndəriləcəyini bildirib. O, cümə günü benzinin bahalaşması ilə bağlı verdiyi açıqlamada 4 ildir ki, bunu etmədiklərini, artımın xalqın mənfəəti və aşağı gəlirli vətəndaşlara yardım məqsədilə edildiyini demişdi.
Yeni qərarın etiraz aksiyalarını səngidə biləcəyi sual altındadır.
İranda hazırda 18 milyon ailəyə adambaşına 45 min tüməndən başlayaraq humanitar yardım verilir.
Qeyd edək ki, İranın 82 milyon əhalisi var.
Xatırladaq ki, etiraz aksiyalarında 100 bank şöbəsi, onlarla hökumət binası və iş yeri yandırılıb, mindən çox etirazçı həbs olunub.
