Sumqayıt şəhərinin baş memarı Fərid Məzahir oğlu Ərşadlı: 8 NOYABR – AZƏRBAYCAN XALQININ QÜRUR, İFTİXAR VƏ ZƏFƏR SALNAMƏSİ!
Azərbaycan xalqının tarixində elə günlər var ki, həmin günlər zamanın yaddaşına qızıl hərflərlə yazılır, nəsillərdən-nəsillərə ötürülərək milli qürur mənbəyinə çevrilir. 8 Noyabr – Zəfər Günü də məhz belə müqəddəs və unudulmaz tarixlərdəndir. Bu tarix yalnız hərbi qələbənin deyil, milli iradənin, sarsılmaz birliyin, Vətən sevgisinin, qəhrəmanlığın və tarixi ədalətin təntənəsidir. Bu gün Azərbaycan xalqı üçün şərəf, ləyaqət, milli qürur və sonsuz iftixar günüdür.
2020-ci il sentyabrın 27-də başlayan Vətən müharibəsi Azərbaycan xalqının taleyində yeni bir tarixi mərhələnin başlanğıcı oldu. Uzun illər işğal altında qalan torpaqlarımızın azad edilməsi uğrunda Azərbaycan Ordusu əks-hücum əməliyyatlarına başladı. Ali Baş Komandanın rəhbərliyi altında rəşadətli ordumuz düşmənə qarşı misilsiz qəhrəmanlıq göstərərək hər gün yeni uğurlara imza atdı. Azərbaycan əsgərinin qətiyyəti, zabitlərimizin peşəkarlığı, xalqımızın bir yumruq kimi birləşməsi qələbəyə aparan yolun əsasını təşkil etdi.
Bu müharibə bir daha sübut etdi ki, Vətən sevgisi ilə yaşayan xalqı heç bir qüvvə öz haqq yolundan döndərə bilməz. Azərbaycan əsgəri döyüş meydanında yalnız silahla deyil, həm də ürəyində daşıdığı Vətən sevgisi, ata-baba torpaqlarına bağlılığı və milli qüruru ilə mübarizə aparırdı. Hər qarış torpaq uğrunda canından keçməyə hazır olan igidlərimiz tariximizin ən şərəfli səhifələrini yazdılar.
Müzəffər Ali Baş Komandan, Prezident cənab İlham Əliyevin siyasi iradəsi, qətiyyətli rəhbərliyi və uzaqgörən strategiyası Zəfərimizin əldə olunmasında müstəsna rol oynadı. Dövlət başçısının müharibə dövründə həm döyüş meydanında, həm də beynəlxalq informasiya məkanında nümayiş etdirdiyi prinsipial mövqe Azərbaycanın haqq səsinin dünyaya çatdırılmasına xidmət etdi. Onun hər çıxışı xalqımıza ruh yüksəkliyi, əsgərimizə güc, dostlarımıza inam, düşmənlərimizə isə Azərbaycanın qətiyyətini göstərən mühüm mesaj idi.
44 gün davam edən Vətən müharibəsi ərzində Azərbaycan Ordusu Cəbrayıl, Füzuli, Zəngilan, Qubadlı və digər yaşayış məntəqələrini işğaldan azad etdi. Şuşanın azad edilməsi isə hərb tariximizin ən möhtəşəm səhifələrindən birinə çevrildi. Dağlar qoynunda yerləşən, Azərbaycanın mədəniyyət paytaxtı olan Şuşanın azadlığı xalqımızın mənəvi dünyasında xüsusi yer tutdu. Xüsusi təyinatlılarımızın çətin relyef şəraitində, böyük cəsarət və peşəkarlıqla həyata keçirdikləri əməliyyat düşmənin məğlubiyyətini sürətləndirdi.
2020-ci il noyabrın 8-də Şuşanın azad olunması xəbəri Azərbaycan xalqına əsl bayram sevinci yaşatdı. Prezident İlham Əliyevin Şəhidlər xiyabanından xalqa müraciəti ilə bu tarixi hadisə bütün dünyaya elan edildi. Şuşanın azad edilməsi müharibənin taleyini həll edən mühüm hadisə oldu. Noyabrın 10-da imzalanmış üçtərəfli bəyanatla hərbi əməliyyatlar dayandırıldı və Azərbaycanın ərazi bütövlüyünün bərpası istiqamətində mühüm mərhələ başa çatdı.
Zəfər tariximizi yazanlar sırasında yalnız hərbçilər deyil, Azərbaycan polisinin qəhrəman əməkdaşları da var. Vətən müharibəsi zamanı polis əməkdaşlarımız da ön cəbhədə və döyüş bölgələrində öz xidməti vəzifələrini böyük məsuliyyətlə yerinə yetirdilər. Onların arasında şəhidlik zirvəsinə ucalan igid polislərimiz də oldu. Vətəndaşların təhlükəsizliyinin təmin edilməsi, strateji ərazilərin qorunması, ictimai asayişin saxlanılması və döyüş bölgələrində həyata keçirilən mühüm tapşırıqlar zamanı polis əməkdaşlarımız əsl fədakarlıq nümunəsi göstərdilər. Onların qəhrəmanlığı Azərbaycan tarixində daim ehtiramla xatırlanacaq. Şəhid polis əməkdaşlarımızın əziz xatirəsi xalqımızın yaddaşında əbədi yaşayacaq.
Bu Zəfərin arxasında minlərlə şəhidimizin müqəddəs qanı, qazilərimizin sağlamlığı, əsgər və zabitlərimizin fədakarlığı dayanır. Şəhid analarının göz yaşları, şəhid atalarının qürurlu baxışları, övladını Vətənə qurban verən ailələrin mənəvi böyüklüyü bu qələbənin mənəvi dəyərini daha da yüksəldir. Biz bu gün azad torpaqlarda qürurla yaşaya biliriksə, bunu canlarını Vətənə fəda edən qəhrəmanlarımıza borcluyuq.
Qazilərimiz isə Zəfər salnaməsinin yaşayan qəhrəmanlarıdır. Onlar döyüş meydanında sağlamlıqlarını itirsələr də, Vətən qarşısında borclarını şərəflə yerinə yetirdilər. Hər bir qazimizin həyat hekayəsi qəhrəmanlıq, sədaqət və mərdlik nümunəsidir. Onlara göstərilən diqqət və qayğı yalnız dövlətin deyil, bütövlükdə cəmiyyətin mənəvi borcudur.
Bu gün işğaldan azad edilmiş ərazilərdə genişmiqyaslı bərpa və quruculuq işləri həyata keçirilir. Qarabağda və Şərqi Zəngəzurda yeni yollar, körpülər, məktəblər, xəstəxanalar, yaşayış kompleksləri tikilir, elektrik və kommunikasiya infrastrukturu yenilənir. Doğma yurdlarından illərlə ayrı düşmüş soydaşlarımızın Böyük Qayıdışı tarixi ədalətin bərpasının daha bir təzahürüdür. Bir zamanlar dağıntılar içində qalan torpaqlarımız bu gün həyatın, quruculuğun və inkişafın yeni ünvanına çevrilir.
8 Noyabr bizə yalnız qələbəni xatırlatmır, həm də gələcək nəsillər qarşısında məsuliyyətimizi yada salır. Bu tarixi günün mahiyyətini gənclərə çatdırmaq, şəhidlərimizin qəhrəmanlıq yolunu təbliğ etmək, qazilərimizə ehtiram göstərmək hər birimizin vətəndaşlıq borcudur. Çünki Zəfər yalnız keçmişimizin deyil, həm də gələcəyimizin möhkəm təməlidir.
Azərbaycan xalqı bir daha sübut etdi ki, milli birlik, dövlətçilik iradəsi və Vətən sevgisi qarşısında heç bir maneə dayana bilməz. Bu gün üçrəngli bayrağımızın Qarabağda, Şuşada, Xankəndidə və digər azad edilmiş torpaqlarımızda dalğalanması hər bir azərbaycanlının qəlbində sonsuz sevinc və qürur hissi yaradır.
8 Noyabr – Zəfər Günü tariximizin şanlı səhifəsi, xalqımızın qəhrəmanlıq salnaməsi, şəhidlərimizin qanı ilə yazılmış müqəddəs dastandır. Bu dastanın hər sətri Vətən sevgisindən, hər səhifəsi igidlikdən, hər cümləsi milli qürurdan yoğrulub. Bu Zəfər heç vaxt unudulmayacaq, bu qəhrəmanlıq heç vaxt yaddaşlardan silinməyəcək!
Əziz həmvətənlər!
Sizi 8 Noyabr – Zəfər Günü münasibətilə ürəkdən təbrik edir, hər birinizə möhkəm cansağlığı, ailə səadəti, firavanlıq və xoş günlər arzulayıram. Şəhidlərimizin əziz xatirəsi daim qəlbimizdə yaşayacaq, qazilərimizə Allahdan şəfa diləyirik. Uca Tanrı xalqımızı, dövlətimizi və rəşadətli ordumuzu qorusun!
Yaşasın müstəqil Azərbaycan! Yaşasın Müzəffər Ali Baş Komandan cənab İlham Əliyev! Yaşasın Azərbaycan Ordusu!
8 Noyabr – Zəfər Günümüz mübarək olsun!
Qarabağ Azərbaycandır!
