Nəsimi rayonu, Cəlil Məmmədquluzadə küçəsində yerləşən “Müəllimlər” mənzil-tikinti kooperativinə məxsus 98 saylı binanın bir qrup payçısı (sakini) keçmiş MTK sədrindən narazıdır.
Tofiq Abdullayev və digər 11 sakin “Qafqazinfo”ya müraciətlərində bildirib ki, MTK 1960-cı ildə yaradılıb və pay sahibləri tərəfindən binanın tikilməsi üçün sərmayə qoyulub: “Burada 0.65 ha həyətin ümumi sahəsində, beşmərtəbəli, beş bloklu, 60 mənzilli olan bina, zirzəmi və 188,3 kv.m sahəsi olan yarımzirzəmisi və s. pay sahiblərinin sərmayəsi hesabına inşa edilib. Bina 1965-ci ildə istismara verilib. Binanın yarızirzəmisi “Azərittifaq”ın laboratoriyasına icarəyə verilib və alınan vəsait həyətin təmizlik işlərinə, xadimə xidmətlərinə, kooperativin mühasibi və kooperativ sədrinə əmək haqqı ödəmək üçün xərclənirdi.
2002-ci ildə binanın sakini Ramazanov Səfər Müslüm oğlu MTK-nın sədr vəzifəsini ələ keçirdikdən sonra əvvəllər icarəyə verilən yarımzirzəmini öz şəxsi ofisinə çevirərək MTK-nı icarədən gələn vəsaitdən məhrum edib. 2017-ci ildə isə yarımzirzəmi saxta sənədlərlə oğlu Ramazanov Böyükağa Səfər oğlunun adına keçirilib.
Bütün bunlardan sonra kooperativ üzvləri iclas keçirərək S. Ramazanovu səsvermə ilə tutduğu vəzifədən azad edib. Sənədlərin və binaya aid möhürün təhvil-təslim zamanı məlum olub ki, binaya və ümumi sahə yə aid olan texniki pasport və kooperativin nizamnaməsi guya itirilib. Eyni zamanda təhvil alınan möhür MTK-nın möhürü yox, “Müəllim” mənzil istismar kooperativ möhürü kimi qeyd olunub. Bu, o deməkdir ki, bu illər ərzində S. Ramazanov tərəfindən sakinlərə verilmiş yaşayış yeri üzrə arayışlar saxta möhürlə verilib. Vergilər Nazirliyinə, İcra Hakimiyyətinin kooperativlər üzrə idarəsinə və Ədliyyə Nazirliyinə ünvanlanmış sorğulara rəsmi cavabda bildirilir ki, həmin möhür heç bir dövlət qurumunda qeydiyyatdan keçməyib. Bu isə o deməkdir ki, S. Ramazanov illər boyu vergilər orqanına heç bir rüsum ödəməyib”.
Sakinlər bildirir ki, həmin məsələdən Nəsimi rayon prokurorluğuna, Bakı şəhər prokurorluğuna şikayət verilib. Hazırda məsələ ilə bağlı Bakı Apellyasiya Məhkəməsinə şikayət olunub və iş məhkəmənin hakimi Xumar Mərdanovanın icraatındadır.
Böyükağa Ramazanovun vəkili Sərxan Məmmədov məsələ ilə bağlı “Qafqazinfo”ya açıqlamasında bildirib ki, sözügedən mülk o vaxt Əmlak Məsələləri üzrə Dövlət Komistəsi tərəfindən keçirilən hərrac nəticəsində əldə olunub:
“Binada təqribən 200 sakin yaşayır, ancaq nədənsə 6-7 sakin hər zaman narazıdır. Onların da əksəriyyəti bir ailənin üzvləri və ya qohumlardır. İddia edirlər ki, həmin əmlak qanunsuz əldə olunub. Nəsimi rayon Prokurluğuna, Respublika Baş Prokurorluğuna müraciət olunub. Araşdırma aparılıb və qərar qəbul olunub ki, cinayət tərkibi yoxdur, mülki işdir. Daha sonra Nəsimi Rayon Məhkəməsinə müraciət edilib və iddia təmin edilməyib. Hazırda iş Apelyasiya Məhkəməsindədir və pandemiya ilə əlaqədar qeyri-müəyyən müddətə təxirə salınıb. Bu həftə baş tutması gözlənilir. Biz hamımız məhkəmənin qərarına tabe olacağıq. Məhkəmə qanunsuz olduğu barədə qərar qəbul etsə, əmlak yenidən ilkin vəziyyətinə qayıdacaq. Yox, bizim xeyrimizə qərar qəbul edilsə, sakinlər də bununla barışmaq məcburiyyətində olacaq. Onu da qeyd edim ki, şikayətçi olan şəxslərin əksəriyyəti binada yerləşən zirzəmiləri qanunsuz olaraq mənimsəyib və həmin mülklərin də hərraca çıxarılmasından narahatdırlar”.
