Azərbaycan Milli Kitabxanasının direktoru, Azərbaycanın əməkdar mədəniyyət işçisi, professor: Heydər Əliyevin 102 illiyi – dövlət və xalq birliyinin rəmzi
Tarixdə elə şəxsiyyətlər var ki, onlar zamanın fövqündə dayanaraq yalnız bir dövrün yox, bir millətin, bir dövlətin taleyinə çevrilirlər. Azərbaycan xalqının ümummilli lideri, dünya miqyaslı siyasi xadim Heydər Əliyev belə nadir şəxsiyyətlərdən biri idi. Onun dövlətçilik fəlsəfəsi, idarəçilik mədəniyyəti və milli dəyərlərə bağlılığı sayəsində Azərbaycan xalqı XX əsrin sonlarında ağır sınaqlardan çıxaraq öz müstəqil yolunu qura bildi.
2025-ci il may ayının 10-da Ulu Öndər Heydər Əliyevin anadan olmasının 102-ci ildönümü tamam olur. Bu əlamətdar tarix təkcə yubiley xarakteri daşımır, həm də milli yaddaşın yenilənməsi, dövlətçilik prinsiplərinin bir daha dərk edilməsi və onun böyük ideyalarının cəmiyyətə ötürülməsi baxımından son dərəcə əhəmiyyətlidir.
Bu münasibətlə Axundov adına Azərbaycan Milli Kitabxanasının direktoru, professor Kərim Tahirov deyir:
“Heydər Əliyevin həyat və fəaliyyət yolu Azərbaycan xalqının bütövlükdə taleyi ilə birbaşa bağlıdır. Onun irsi bir kitabxana deyil, bütöv bir milli ideologiyadır.”
1923-cü ilin 10 mayında Naxçıvanda anadan olan Heydər Əliyev, hələ gənc yaşlarından dövlət idarəçiliyində məsul vəzifələrdə çalışmış, bacarığı, zəhməti və milli ruhu ilə qısa zamanda SSRİ miqyasında tanınmış siyasi xadimə çevrilmişdir. 1969-cu ildə Azərbaycan SSR Kommunist Partiyasının birinci katibi seçilən Heydər Əliyevin rəhbərliyi ilə respublika qısa zamanda sənaye, kənd təsərrüfatı, təhsil və mədəniyyət sahələrində misilsiz nailiyyətlər əldə etdi.
Ən əsası isə o idi ki, Heydər Əliyev Azərbaycan xalqında milli özünüdərk hissini oyatdı.
Heydər Əliyev yalnız siyasətçi deyildi. O, böyük maarifçi, kitabsevər və elmin tərəfdarı idi. Ulu Öndər daim qeyd edirdi: “Millətin gələcəyi onun mədəni səviyyəsi və təhsili ilə müəyyən olunur.” Bu baxış onu daim kitabın, maarifin, kitabxananın yanında saxlayırdı.
Ulu Öndərin təşəbbüsü ilə 1971-ci ildə Milli Kitabxana dövlət statusu aldı. Bu, sadəcə inzibati qərar deyildi. Bu, kitabın milli təhlükəsizlik məsələsi qədər vacib olduğuna dair dövlət iradəsi idi.
Professor Kərim Tahirov qeyd edir: “Heydər Əliyev kitabxanaları sadəcə kitab saxlanılan yer deyil, milli ruhun, tariximizin, kimliyimizin qorunduğu ocaq kimi dəyərləndirirdi. Milli Kitabxananın fəaliyyətinə göstərdiyi daimi diqqət və qayğı bunu sübut edir.”
Bu gün Axundov adına Azərbaycan Milli Kitabxanası yalnız ölkənin ən böyük informasiya və mədəniyyət mərkəzi deyil, eyni zamanda Ulu Öndər Heydər Əliyevin zəngin irsini qoruyub yaşadan milli yaddaş məkanıdır. Burada Ulu Öndərin həyat və fəaliyyətini əks etdirən minlərlə kitab, sənəd, foto və arxiv materialları qorunur, tədqiq olunur, elmi dövriyyəyə buraxılır.
Milli Kitabxanada mütəmadi olaraq “Heydər Əliyev irsi və Azərbaycançılıq ideologiyası”, “Heydər Əliyev və mədəniyyət siyasəti”, “Heydər Əliyev və kitab” kimi mövzularda konfranslar, sərgilər, oxu günləri və elmi seminarlar təşkil olunur. Bu tədbirlərdə gənclər, ziyalılar və tələbələr iştirak edərək dahi liderin irsini daha dərindən öyrənmək imkanı əldə edirlər.
Heydər Əliyev hər zaman vurğulayırdı ki, milli mədəniyyət, ədəbiyyat və sənət bir xalqın ruhunu yaşadan əsas sütunlardır. O, görkəmli yazıçıların, şairlərin, alimlərin fəaliyyətini yüksək qiymətləndirir, onların əsərlərinin çapını və təbliğini dəstəkləyirdi. Təsadüfi deyil ki, onun rəhbərliyi dövründə kitab nəşri, tərcümə işləri, klassik irsin təbliği geniş vüsət aldı.
Ulu Öndərin şəxsi təşəbbüsü ilə Nizami, Füzuli, Nəsimi, Mirzə Fətəli Axundzadə, Cəlil Məmmədquluzadə kimi ədiblərin əsərləri kütləvi şəkildə nəşr olunaraq geniş oxucu auditoriyasına təqdim olundu.
Professor Kərim Tahirov vurğulayır:
“Heydər Əliyevin yaratdığı müasir dövlətçilik məktəbi mədəniyyətə əsaslanırdı. O deyirdi: kitab oxumayan millət qaranlıqda qalar.”
Heydər Əliyev daim gənclərin təhsilinə və dünyagörüşünün artırılmasına xüsusi diqqət yetirirdi. O, Azərbaycanın gələcəyinin savadlı, vətənpərvər və milli düşüncəyə malik gənclərin əli ilə qurulacağını dərk edirdi. Bu səbəbdən Ulu Öndər bir çox çıxışlarında kitabxanaların gənclərin formalaşmasında əvəzsiz rol oynadığını qeyd etmişdir.
Bu gün Milli Kitabxanada gənclərin iştirakı ilə keçirilən tədbirlər, müzakirələr və intellektual müsabiqələr Ulu Öndərin bu sahədə müəyyən etdiyi strateji xəttin davamıdır. Onun “Gələcək gənclərlə gələcəkdir” fikri bu gün də öz aktuallığını qoruyur.
2025-ci il Ulu Öndərin anadan olmasının 102-ci ildönümünün qeyd edilməsi yalnız yubiley xarakteri daşımır. Bu, xalqın öz liderinə olan minnətdarlığını ifadə etdiyi milli təqvim hadisəsidir. Bu gün Azərbaycanda keçirilən hər bir tədbirdə, görülən hər bir inkişaf işində Heydər Əliyev irsinin izi hiss olunur. O, bu xalqın yaddaşında yalnız bir siyasətçi kimi deyil, bir xilaskar, bir qurucu, bir ata kimi yaşayır.
Professor Kərim Tahirov haqlı olaraq bildirir:
“Heydər Əliyevin irsi bir kitabxanada saxlanılası material deyil, bu, bir millətin həyat kitabıdır. Biz bu kitabı oxumalı, öyrənməli və gələcək nəsillərə ötürməliyik.”
Bu gün Prezident İlham Əliyevin rəhbərliyi ilə həyata keçirilən siyasət – istər Qarabağın azadlığı, istər iqtisadi dirçəliş, istərsə də mədəni irsin qorunması – Heydər Əliyevin ideyalarının həyat bulmasıdır. Ulu Öndərin yaratdığı siyasi məktəb bu gün də müasirdir və Azərbaycanın suveren, güclü, mədəni dövlət kimi inkişafında əsas ideoloji dayaqlardan biridir.
Milli Kitabxananın fəaliyyəti də bu ideoloji cəbhənin bir hissəsidir. Burada Heydər Əliyev fondu, Heydər Əliyev guşələri, “Azərbaycançılıq” fəlsəfəsinə həsr olunmuş oxu zalı fəaliyyət göstərir. Bu məkanlar həm tədqiqatçılar, həm tələbələr, həm də sadə vətəndaşlar üçün açıqdır.
Heydər Əliyev təkcə dövlətin qurucusu deyil, həm də milli ruhun, milli iradənin və milli qürurun daşıyıcısı idi. Onun irsi bu gün kitabxanalarda qorunur, tədqiq olunur və öyrədilir. Milli Kitabxana bu baxımdan həm bir elmi-tarixi mərkəz, həm də bir ruhani məkandır.
2025-ci il 10 may tarixində onun 102 illiyi qeyd edilərkən bir daha bütün Azərbaycan xalqı anlayır ki, Heydər Əliyev xalqın yaddaşında yaşayan canlı tarixdir.
Allah Ulu Öndərimizə rəhmət eləsin! Ruhu daim şad olsun!
Beynelxalqinformasiyaagentliyi.az
