Türkiyənin tanınmış köşə yazarı Əhməd Hakan ABŞ-İran gərginliyi ilə bağlı yazısında bir sıra önəmli məqamlara toxunub.
Ə.Hakan İranın bu savaşda qalib gəlmək ehtimalının az olduğunu deyərək, bəzi hadisələrə diqqət çəkib.
O, Qasım Süleymaninin dəfn mərasimində izdiham baş verməsini, 60-dan çox insanın həlak olmasını, xeylisinin yaralanmasını xatırladıb və bunu İran üçün neqativ hal kimi qiymətləndirib:
“İran ABŞ-a ağır zərbə vuracağını dedi, əvəzində isə özünün onlarla vətəndaşı həlak oldu”.
Müəllif həmçinin qarşıdurmanın iki ölkə liderinin işinə yaradığını vurğulayıb:
“Tramp da, Ruhani də son olaylara görə məmnundur. ABŞ liderinin impiçmenti məsələsi unuduldu, növbəti seçkidə şansı artdı. İran tərəfi də razıdır. Ölkədəki kütləvi etirazların izi-tozu qalmadı, rejim yenidən gücləndi”.
Əhməd Hakan Yaxın Şərqin xilasının bunlar olduğunu qeyd edib:
“1. Dindarlığın mərkəzinə əxlaqı qoymaq.
2. Bir xilaskarı gözləməkdənsə özünü xilas etmək.
3. İnsanların seçimlərinə qarşı çıxmaq əvəzinə hörmət etməyi öyrənmək.
4. Cəhalətə qarşı amansız bir cihad başlatmaq.
5. Günahı başqalarında deyil, özündə axtarmaq”.
Əhməd Hakan bütün bu fikirlərini ümumiləşdirərək, İranın bu savaşda qalib gəlmək şansı olmadığını vurğulayıb. (axar.az)
